May 28, 2025
Dr. Chrysanthi Balomenou, pedagoge në Departamentin e Bankës dhe Financës, pranë Fakultetit të Ekonomisë dhe Shkencave Administrative (FEAS) në Universitetin EPOKA, mori së fundmi pjesë në një mobilitet mësimor për stafin akademik në kuadër të programit Erasmus+, në Universitetin Kombëtar të Shkencës dhe Teknologjisë POLITEHNICA Bukuresht – Qendra Universitare e Piteștit, në Rumani.
Kjo përvojë e vlefshme i mundësoi Dr. Balomenou-t të lidhej me kolegë dhe studentë nga një ambient i ndryshëm akademik dhe kulturor, duke forcuar më tej angazhimin e EPOKA-s ndaj bashkëpunimit dhe shkëmbimit ndërkombëtar. Gjatë vizitës së saj, ajo mbajti leksione dhe zhvilloi diskutime të frytshme mbi tema aktuale si Banka, Ekonomia Monetare dhe Rajonale, Sipërmarrja, dhe Zhvillimi i Qëndrueshëm – fusha me rëndësi të veçantë në realitetin ekonomik të ditëve të sotme.
Dr. Balomenou shprehu mirënjohjen e saj të thellë për mikpritjen dhe bashkëpunimin e shkëlqyer nga pala pritëse. Falënderime të veçanta iu adresuan Zv.Dekanes së Fakultetit të Shkencave Ekonomike dhe Juridike, Associate Professor Dr. Amalia Dutu, dhe ekipit të saj të mrekullueshëm, si dhe znj. Carmen-Adreea Oneata nga Zyra e Marrëdhënieve Ndërkombëtare, për mbështetjen dhe bashkëpunimin e frytshëm gjatë gjithë vizitës.
Duke reflektuar mbi këtë përvojë, Dr. Balomenou theksoi rëndësinë e këtyre mundësive për forcimin e mirëkuptimit dhe bashkëpunimit global në kërkimin shkencor dhe edukim. “Mundësi të tilla na kujtojnë se shkëmbimi dhe bashkëpunimi ndërkombëtar janë jashtëzakonisht të çmuara dhe me rëndësi të madhe për arsimin dhe më gjerë,” u shpreh ajo.
Universiteti EPOKA mbetet i përkushtuar në promovimin e mobilitetit akademik ndërkombëtar, duke e konsideruar atë si një shtyllë të rëndësishme të ekselencës në arsimin e lartë.
