Më 5 qershor 2025, Universiteti EPOKA pati kënaqësinë të mirëpresë një delegacion prej 29 studentësh të programit Executive MBA nga TSM Business School, University of Twente (Holandë), të shoqëruar nga znj. Janneke Deterink, Drejtoreshë e Programit, si pjesë e vizitës së tyre studimore ndërkombëtare në Shqipëri.

Vizita u shoqërua me një program të pasur akademik që përfshinte shkëmbime idesh, diskutime mbi lidershipin dhe arsimin, si dhe dialog ndërkulturor. Ajo shërbeu si një platformë për të thelluar kuptimin e ndërsjellë dhe për të forcuar lidhjet mes institucioneve arsimore shqiptare dhe atyre ndërkombëtare.

Pikat kryesore të vizitës përfshinë:

• Fjalë hapëse: Assoc. Prof. Dr. Alba Kruja, Dekane e Fakultetit të Ekonomisë dhe Shkencave Administrative, hapi aktivitetin me një prezantim me temë “Lidershipi, Arsimi dhe Biznesi në Shqipëri: Një Perspektivë Universitare.”
• Arsimi dhe Sipërmarrja Sociale: Dr. Besjon Zenelaj, Drejtor i Qendrës Yunus për Biznes Social dhe Qëndrueshmëri, trajtoi temën “Sfidat dhe Mundësitë në Arsimin e Lartë Shqiptar.”
• Inovacioni dhe Ndërkombëtarizimi: Dr. Florenc Skuka, Shef i Departamentit të Administrimit të Biznesit, prezantoi mbi “Roli i EPOKA-s në Ndërkombëtarizim dhe Inovacion.”
• Rruga nga studenti në pedagog: Dr. Vilma Cekani, pedagoge dhe ish-studente e programit MBA në EPOKA, ndau përvojën e saj akademike dhe perspektivën në lidhje me zhvillimet në peizazhin arsimor shqiptar dhe ndërkombëtar.
• Diskutim i hapur: Një diskutim interaktiv mbi lidershipin dhe kulturën në kontekst, me pjesëmarrjen e studentëve të MBA-së, stafit akademik të EPOKA-s dhe studentëve tanë.
   

Aktiviteti u mbyll me një sesion rrjetëzimi dhe koktej, ndjekur nga një tur i guiduar në ambientet moderne të kampusit dhe qendrat e inovacionit të universitetit.

Universiteti EPOKA ndjen mirënjohje për këtë vizitë frymëzuese dhe për bashkëpunimin e ngushtë me TSM Business School. Kjo ngjarje jo vetëm që thelloi bashkëpunimin akademik, por gjithashtu forcoi marrëdhëniet gjithnjë e më të ngushta mes Shqipërisë dhe Holandës në fushën e arsimit të lartë dhe zhvillimit të lidershipit.

Presim me padurim bashkëpunime të reja dhe dialog të vazhdueshëm në të ardhmen!