Pas tre vitesh aktivitetesh, Projekti COWEB zhvilloi Konferencën Ndërkombëtare Përmbyllëse dhe Takimin e Koordinimit në Universitetin Ndërkombëtar Burch, në Sarajevë, më 30–31 tetor 2025. Ngjarja mblodhi së bashku partnerët e konsorciumit të projektit, studiues, edukatorë dhe politikëbërës nga Ballkani Perëndimor dhe Bashkimi Evropian, për të festuar arritjet, ndarë rezultatet kërkimore dhe për të përcaktuar të ardhmen e Mësimit Virtual Bashkëpunues (VCL) në arsimin e lartë.

Gjatë dy ditëve dinamike, pjesëmarrësit morën pjesë në sesione tematike që trajtuan Inovacionin Pedagogjik dhe të Ardhmen e Mësimit Virtual Bashkëpunues: Teknologjia, Kompetencat dhe Qëndrueshmëria. Prezantimet eksploruan metoda inovative mësimdhënieje, strategji institucionale dhe zgjidhje digjitale që nxisin bashkëpunimin, shkëmbimin ndërkulturor dhe aftësitë digjitale tek studentët dhe stafi akademik.

Gjatë ngjarjes u prezantua libri me qasje të hapur “Higher Education Contemporary Learning Landscape: Virtual Collaborative Learning”, bashkë-redaktuar në kuadër të projektit dhe që përfshin kontribute nga të gjitha institucionet partnere.

Libri mund të lexohet dhe shkarkohet në linkun: https://toknowpress.net/ISBN/978-83-65020-54-3.pdf.

Dr. Esmir Demaj, Menaxher i Projektit COWEB, prezantoi momentet kyçe të projektit, reflektoi mbi arritjet e tre viteve të fundit, përshkroi strategjitë për ruajtjen e rezultateve përtej përfundimit zyrtar të tij, si dhe theksoi përkushtimin e Universitetit EPOKA ndaj përmirësimit të cilësisë së arsimit përmes përqafimit të pedagogjive digjitale inovative. Universiteti EPOKA u përfaqësua gjithashtu nga Dr. Armando Demaj, Drejtor i Zyrës së Kërkimeve dhe Projekteve (RPO), Dr. Nertil Mera, oficer financiar i projektit, PhDc. Anisa Isufi, e cila prezantoi punimin bashkautor “Vlerësimi i Performancës së Studentëve në Mjediset e VCL: Metoda, Sfidat dhe Praktikat e Mira”, si dhe assistentet mësimore, Angela Bajrami dhe Rilinda Korbi, të cilat shërbyen si e-tutore gjatë Moduleve Rajonale dhe Ndërkombëtare të VCL.

Ndërsa Projekti COWEB i afrohet përfundimit të tij, ai lë pas një trashëgimi të fortë të inovacionit dhe transformimit digjital në arsim, duke forcuar bashkëpunimin rajonal dhe duke fuqizuar universitetet të udhëheqin kalimin drejt mjediseve mësimore gjithëpërfshirëse dhe të orientuara drejt së ardhmes.