Departamenti i Administrimit të Biznesit në EPOKA University festoi me krenari diplomimin e studentëve të tij të Gjeneratës 2026, duke shënuar një moment të rëndësishëm në rrugëtimin e tyre akademik dhe personal.

Këtë vit, gjithsej 159 studentë nga programet e Departamentit të Administrimit të Biznesit përfunduan me sukses studimet e tyre dhe morën diplomat universitare: 115 të diplomuar nga programi Bachelor në Informatikë Ekonomike, 19 të diplomuar nga programi Bachelor në Administrim Biznesi dhe 25 të diplomuar nga programi Bachelor në Marketing Ndërkombëtar dhe Menaxhim Logjistik.

Ceremonia e diplomimit u shoqërua me emocione, krenari dhe gëzim, ndërsa studentë, familjarë, staf akademik dhe të ftuar u mblodhën për të festuar këtë arritje të rëndësishme. Të diplomuarit e secilit program u ftuan në skenë për të marrë diplomat e tyre nga Përgjegjësja e Departamentit të Administrimit të Biznesit, Assoc. Prof. Dr. Nargiza Alymkulova, duke simbolizuar përfundimin me sukses të rrugëtimit të tyre akademik në EPOKA University.

Një moment i veçantë i ceremonisë ishte vlerësimi i studentëve me performancën më të lartë akademike, të cilët morën mirënjohje nga Dekania e Fakultetit të Ekonomisë dhe Shkencave Administrative, Assoc. Prof. Dr. Alba Kruja. Departamenti i Administrimit të Biznesit përgëzon me krenari tre të diplomuarit që përfunduan studimet me një rezultat të jashtëzakonshëm GPA 4.00:

• Irsa Mello – Bachelor në Marketing Ndërkombëtar dhe Menaxhim Logjistik
• Ajlin Hoxha – Bachelor në Informatikë Ekonomike
• Altea Janopullo – Bachelor në Informatikë Ekonomike

Në emër të studentëve të diplomuar, Ajlin Hoxha mbajti një fjalim frymëzues, duke reflektuar mbi kuptimin e vërtetë të suksesit dhe rrugëtimin që i solli studentët deri në këtë moment të rëndësishëm:

"Suksesi i vërtetë nuk qëndron në rezultatet finale, por në përpjekjet e vogla që bëjmë çdo ditë, në herët kur nuk dorëzohemi kurrë, në mundësitë që na jepen dhe në atë çfarë zgjedhim të bëjmë me to. Jam e lumtur që tre vite më parë zgjedhja ime ishit ju."

Departamenti i Administrimit të Biznesit shpreh urimet më të përzemërta për të gjithë të diplomuarit për përkushtimin, këmbënguljen dhe arritjet e tyre gjatë viteve të studimit. Jemi krenarë për profesionistët që ata janë bërë dhe besojmë se do të vazhdojnë të sjellin kontribut të vlefshëm në karrierën e tyre dhe në komunitetet ku do të angazhohen.

Një falënderim i veçantë u drejtohet edhe prindërve dhe familjeve të studentëve tanë, të cilët i kanë mbështetur gjatë gjithë këtij rrugëtimi dhe i kanë besuar EPOKA University edukimin dhe zhvillimin e fëmijëve të tyre.

Urime Gjeneratës 2026! Ju urojmë suksese të mëtejshme ndërsa nisni një kapitull të ri në jetën tuaj profesionale dhe personale.

Ndiqni ceremoninë e plote këtu