Në kuadër të lëndës Digital Banking and Innovation, pjesë e programit të studimeve Master në FinTech, i ofruar nga Departamenti i Banking dhe Financës pranë Fakultetit të Ekonomisë dhe Shkencave Administrative në Epoka University, lektorja Dr. Chrysanthi Balomenou, së bashku me asistentin Mr. Bjorni Merko, mirëpritën tre drejtues ekzektutiv nga Raiffeisen Bank Albania për zhvillimin e një leksioni të hapur me temë: “Burimet Njerëzore në Epokën Digjitale: Optimizimi i Strukturës dhe Sistemit të Stimujve, Fokusimi në Rezultatet e Biznesit dhe Hartimi i një Vizioni të Ri Strategjik për Stafin.”

Leksioni u ofroi studentëve të programit Master një pasqyrë të vlefshme mbi mënyrën se si inovacioni, transformimi digjital dhe kultura organizative po ndikojnë në të ardhmen e sektorit bankar dhe të shërbimeve financiare.

Të ftuarat ndanë me studentët eksperiencën dhe njohuritë e tyre në fusha të ndryshme të transformimit të industrisë bankare:

• Elona Llaci prezantoi zhvillimet më të fundit në sektorin bankar në nivel global dhe në Shqipëri, duke u fokusuar në faktorët kryesorë që nxisin inovacionin në banka dhe kalimin drejt ekosistemeve të orientuara nga shërbimet digjitale. Prezantimi trajtoi tema si Inteligjenca Artificiale (AI), Open Banking, embedded finance, teknologjia blockchain, asetet digjitale dhe inovacioni i orientuar drejt klientit.
• Arlinda Budo ndau perspektiva mbi menaxhimin e burimeve njerëzore në epokën digjitale, duke theksuar rëndësinë e kulturës organizative, të nxënit të vazhdueshëm, përgjegjshmërisë, bashkëpunimit dhe fuqizimit të talenteve si elementë kyç për nxitjen e inovacionit dhe arritjen e objektivave të biznesit.
• Artemida Alltari u ndal te partneritetet me kompanitë FinTech, ekosistemet e inovacionit dhe rëndësia e bashkëpunimit ndërmjet bankave dhe partnerëve teknologjikë në transformimin e përvojës së klientit dhe krijimin e modeleve të reja të biznesit.

Gjatë leksionit, studentët diskutuan mbi zhvillimet më të rëndësishme që po transformojnë sektorin bankar, duke përfshirë digjitalizimin dhe inovacionin, përdorimin e inteligjencës artificiale dhe machine learning në banking, Open Banking dhe API-të, embedded finance, teknologjinë blockchain, transformimin e përvojës së klientit, ndërtimin e një kulture inovative, si dhe sfidat që lidhen me sigurinë kibernetike, kuadrin rregullator, etikën e inteligjencës artificiale dhe qëndrueshmërinë operacionale.

Studentët u njohën gjithashtu me vizionin, misionin dhe kulturën e inovacionit të Raiffeisen Bank Albania, si dhe me iniciativat e saj të orientuara drejt studentëve, veçanërisht programin Key Academy, i cili krijon një urë lidhëse ndërmjet arsimit universitar dhe tregut të punës, duke ofruar mundësi për zhvillim profesional dhe punësim.

Leksioni u zhvillua në një atmosferë interaktive dhe frymëzuese, duke nxitur diskutime të hapura mes studentëve dhe përfaqësuesve të industrisë. Aktiviteti forcoi më tej bashkëpunimin ndërmjet universitetit dhe sektorit bankar, duke u ofruar studentëve një kuptim më të thellë të transformimit digjital, inovacionit dhe sfidave që po formësojnë të ardhmen e industrisë financiare.