Departamenti i Administrimit të Biznesit në EPOKA UNIVERSITY organizon leksion të hapur mbi Sigurinë Kibernetike dhe Ndërgjegjësimin Financiar

Departamenti i Administrimit të Biznesit në EPOKA UNIVERSITY zhvilloi së fundmi një leksion të hapur mbi Sigurinë Kibernetike dhe Ndërgjegjësimin Financiar, si pjesë e kursit Etika dhe Çështjet Sociale në Sistemet e Informacionit, i drejtuar nga Dr. Vilma Çekani. Leksioni trajtoi rreziqet në rritje të mashtrimeve online dhe rolin thelbësor të sigurisë kibernetike në transaksionet financiare.

Ligjëruesi i ftuar, Fatjon Muça, Drejtor i Departamentit të Sigurisë së Informacionit në Fibank Albania dhe anëtar i Komitetit të Sigurisë Kibernetike në AAB, ndau njohuri të rëndësishme mbi kërcënimet kibernetike moderne, metodat e parandalimit të mashtrimeve dhe praktikat e bankimit të sigurt. Ai prezantoi strategjinë Defense in Depth, një qasje e sigurisë me disa shtresa mbrojtjeje, dhe përshkroi evolucionin e kërcënimeve kibernetike për të ndihmuar studentët të kuptojnë si janë zhvilluar teknikat e hakerimit ndër vite.

Një nga faktet më tronditëse të ndara gjatë leksionit ishte se Shqipëria përballet me një sulm kibernetik çdo 22 sekonda. Muça shpjegoi llojet e ndryshme të rreziqeve kibernetike, përfshirë phishing, social engineering, zero-day attacks dhe malware, duke sjellë shembuj konkretë të mashtrimeve reale—si email-et dhe mesazhet SMS të rreme që imitojnë Postën Shqiptare, duke u përpjekur të mashtrojnë viktimat për të dhënë të dhënat e tyre personale.

Për t’i ofruar studentëve një përvojë më konkrete mbi kërcënimet kibernetike, ligjëruesi demostroi një simulim të një virusi, duke treguar se si malware mund të depërtojë në sisteme dhe të shkaktojë dëme të mëdha. Kjo demonstratë e qartë dhe praktike theksoi rëndësinë e masave parandaluese të sigurisë në një botë gjithnjë e më dixhitale.

Një nga mesazhet kryesore të leksionit ishte përgjegjësia për të rritur ndërgjegjësimin, veçanërisht te prindërit dhe të moshuarit, të cilët shpesh janë më të cenueshëm ndaj mashtrimeve online. Diskutimi preku gjithashtu strategjitë e mbrojtjes së të dhënave, ndikimin e luftës kibernetike globale dhe kërkesën në rritje për profesionistë të sigurisë kibernetike, një fushë me perspektiva të mëdha punësimi dhe paga konkurruese.

Sesion interaktiv ngjalli diskutime të shumta, me studentë që bënë pyetje të thelluara mbi sigurinë e bankimit dixhital dhe strategjitë e mbrojtjes nga sulmet kibernetike. Duke i pajisur studentët me njohuri praktike, ky leksion i ndihmoi ata të navigojnë botën dixhitale më të sigurt dhe më të vetëdijshëm.

Qëndroni vigjilentë, mbrohuni online!