November 14, 2025
Një ligjëratë e hapur me titull "Lens on Tomorrow: Earthquake Engineering, Science & Education for Resilience" u mbajt së fundmi në Universitetin “EPOKA”, ku Prof. Dr Radmila Salic Makreska zhvilloi një prezantim për studentët.
Ligjërata u ndoq nga studentët e vitit të dytë dhe të tretë të Inxhinierisë së Ndërtimit. Prof. Dr Makreska trajtoi konceptin e qëndrueshmërisë në një këndvështrim të gjerë, duke theksuar rreziqet dhe hazardet sizmike që kanë rëndësi si në kontekstin lokal ashtu edhe atë rajonal. Prezantimi i saj përfshiu gjithashtu një përmbledhje të përgjithshme të projekteve kërkimore ku institucioni i saj është i angazhuar, si dhe të infrastrukturës së tyre moderne kërkimore.
Pas nënshkrimit zyrtar të Memorandumit të Mirëkuptimit (MoU) midis Universitetit “EPOKA” dhe IZIIS, Prof. Dr Makreska theksoi mundësitë e reja të bashkëpunimit. Këto përfshijnë shkëmbimet e stafit akademik dhe studentëve, projektet e përbashkëta kërkimore, organizimin e përbashkët të seminareve dhe programeve të trajnimit, si dhe nisma që synojnë forcimin e lidhjeve kulturore dhe akademike ndërmjet dy institucioneve.
Ky bashkëpunim tashmë ka nisur të konkretizohet: Zabedin Neziri, kandidat i doktoraturës nga IZIIS, po zhvillon një qëndrim dy-mujor kërkimor në Universitetin “EPOKA”, ku po punon mbi temën e doktoraturës "Vlerësimi Probabilistik i Rrezikut Sizmik për Maqedoninë e Veriut si bazë për Zonimin Sizmik sipas Eurokodit 8, Gjenerata e 2-të", nën mbikëqyrjen e Dr Anila Xhahysa.
