October 16, 2025
Universiteti EPOKA, përmes Zyrës së Marrëdhënieve Ndërkombëtare (IRO) dhe Zyra e Hulumtimit dhe Projekteve (RPO), merr pjesë me krenari në aktivitetin Erasmus Info Day, që po zhvillohet sot, më 16 tetor 2025, në ambientet e Europe House në Tiranë. EPOKA përfaqësohet nga drejtuesi i zyrës, Dr. Armando Demaj, si dhe specialistet Marsida Caca (IRO) dhe Ajsela Toci (RPO).
Ky aktivitet, i cili organizohet në kuadër të festës ndërkombëtare Erasmus Days, bashkon universitete, studentë, organizata rinore dhe OJF për të promovuar ndikimin dhe mundësitë që ofron programi Erasmus+. Gjatë ditës, pjesëmarrësit ndjekin sesione informuese, aktivitete rrjetëzimi dhe prezantime mbi praktikat më të mira për aplikime të suksesshme në programet Erasmus+.
Pjesëmarrja e Universitetit EPOKA në këtë aktivitet thekson angazhimin e tij për nxitjen e bashkëpunimit ndërkombëtar, mobilitetit akademik dhe shkëmbimeve arsimore. Në këtë mënyrë, EPOKA vijon të forcojë partneritetet në mbarë Evropën dhe të krijojë më shumë mundësi zhvillimi për studentët dhe stafin e saj akademik.
