May 20, 2025
Më 20 maj 2025, Kryetari i Autoritetit të Konkurrencës, z. Denar Biba, zëvendëskryetarja, znj. Ledia Matja, dhe Drejtoresha e Drejtorisë së Mbikëqyrjes së Tregjeve Prodhues, znj. Mimoza Kodhelaj, zhvilluan një vizitë në Universitetin EPOKA.
Delegacioni i Autoritetit të Konkurrencës u prit nga Rektori i Universitetit EPOKA, Prof. Dr. Ahmet Oztas, Administratori, Dr. Esmir Demaj, dhe Shefi i Departamentit të Drejtësisë, Dr. Gentjan Skara.
Qëllimi i vizitës ishte nënshkrimi i një Memorandumi Mirëkuptimi ndërmjet dy institucioneve. Ky memorandum synon të forcojë bashkëpunimin mes palëve, të rrisë konkurrencën e lirë dhe efektive, si dhe të krijojë mundësi për trajnimin dhe kualifikimin e studentëve dhe stafit akademik në fushën e konkurrencës.
Pas nënshkrimit të Memorandumit të Mirëkuptimit, z. Denar Biba mbajti një forum të hapur me temën: “Roli i Autoritetit të Konkurrencës në Sigurimin e një Konkurrence të Lirë dhe Efektive në Treg.”
Në fjalën e tij, z. Biba theksoi rëndësinë e konkurrencës në një treg të liberalizuar dhe bëri një përmbledhje të ligjit shqiptar për konkurrencën, duke u ndalur në:
i) karakteristikat e marrëveshjeve kufizuese,
ii) abuzimin me pozitën dominuese, dhe
iii) procedurën e gjobitjes.
Universiteti EPOKA falënderon Kryetarin e Autoritetit të Konkurrencës, z. Denar Biba, për bashkëpunimin dhe shpreh gatishmërinë për projekte dhe aktivitete të përbashkëta që synojnë rritjen e kulturës së konkurrencës.
