Më 9 Prill 2025, Departamenti i Shkencave Politike dhe Marrëdhënieve Ndërkombëtare në EPOKA, në bashkëpunim me Zyrën Rajonale për Bashkëpunim Rinor (RYCO) Tirana, çeli ditën e parë të Shkollës Simuluese për Vendimmarrjen në Bashkimin Europian. Aktiviteti mirëpriti nxënës të shkollave të mesme nga e gjithë Shqipëria, të cilët u mentoruan nga studentët e Departamentit të Shkencave Politike dhe Marrëdhënieve Ndërkombëtare dhe u udhëhoqën përmes proceseve të ndërlikuara të vendimmarrjes në Bashkimin Europian.

Dita nisi në Europe House me një sesion hapës të pasuruar nga të ftuar të nderuar. Assoc. Prof. Dr. Lisen Bashkurti, Dekan i Fakultetit të Drejtësisë dhe Shkencave Sociale në EPOKA, z. Jean-Baptiste Le Bras, Zëvendësshef i Seksionit Politik në Delegacionin e BE-së në Shqipëri, znj. Blerta Rama, Zëvendësministre e Ekonomisë, Kulturës dhe Inovacionit, znj. Ajla Maksuti nga Qendra për Hapje dhe Dialog në Kryeministri, dhe z. Kreshnik Loka, Drejtor i RYCO Tirana, mbajtën fjalime frymëzuese për të pranishmit. Të gjithë theksuan rëndësinë e pjesëmarrjes së të rinjve në hartimin e politikave, diskursin publik dhe bashkëpunimin rajonal.

Pas sesionit hapës, u zhvillua një trajnim për të folurin në publik dhe lidership me temën: “Fuqia e Fjalës: Lidershipi Rinor dhe Të Folurit në Publik,” i zhvilluar nga znj. Jorida Tabaku. Ky trajnim inkurajoi pjesëmarrësit të rrisin vetëbesimin dhe të përforcojnë aftësitë e tyre komunikuese, të rëndësishme për angazhimin publik dhe rolet drejtuese.

Pasdite, aktivitetet u zhvendosën në ambientet e EPOKA University, ku pjesëmarrësit morën pjesë në dy trajnime shtesë. Dr. Avdi Smajlaj, pedagog në EPOKA, mbajti një prezantim të detajuar mbi strukturën dhe funksionimin e institucioneve të BE-së. Ndërkohë, znj. Flutura Brakaj, Oficere Programi në RYCO, udhëhoqi një sesion mbi teknikat e debatit dhe negociatës, duke përgatitur nxënësit për aktivitetet simuluese që do të pasojnë.

Shkolla Simuluese u drejtua nga Dr. Dea Bashkurti, ekspertiza dhe drejtimi i së cilës në çështjet e BE-së kanë formësuar strukturën akademike të programit, dhe bashkëdrejtohet nga znj. Morena Mulhaxhia, e cila ka luajtur një rol kyç në organizimin dhe mentorimin e pjesëmarrësve.

EPOKA University shpreh mirënjohjen e saj për të gjithë të ftuarit, trajnerët dhe partnerët institucionalë që kontribuan në nisjen e suksesshme të kësaj shkolle simuluese, si dhe falënderon në mënyrë të veçantë RYCO Tirana për bashkëpunimin e çmuar.