Tiranë, 27 Nëntor 2024 – Departamenti i Administrimit të Biznesit, në bashkëpunim me Zyrën e Planifikimit të Karrierës dhe Alumni në Universitetin Epoka, organizoi një vizitë studimore në KRACO, liderin e prodhimit të ushqimeve në Shqipëri. Kjo vizitë u dha studentëve mundësinë për të lidhur njohuritë teorike me përvojën praktike në një mjedis real biznesi.

KRACO, një lider në prodhimin e çajrave, infuzioneve bimore, pijeve të çastit dhe më shumë, është një markë e njohur jo vetëm në Shqipëri, por edhe ndërkombëtarisht, me produkte të shpërndara në vende si Spanja, Franca, Italia dhe Arabia Saudite. E themeluar në vitin 1997 me produktin e saj të parë, sheqerin e paketuar, KRACO ka njohur një rritje të jashtëzakonshme, duke ofruar mbi 130 lloje apo variante produktesh. Pothuajse 600,000 produkte KRACO konsumohen në tregun shqiptar dhe atë europian.

Studentët e vitit të parë të departamenteve të Bankave dhe Financave dhe Ekonomisë nga Universiteti Epoka u pritën me ngrohtësi nga ekipi i KRACO-s. Anxhela, Specialiste e Burimeve Njerëzore, ndau informacione mbi operacionet e kompanisë, duke shpjeguar dhe vizituar departamente të ndryshme si logjistika, marketingu, burimet njerëzore, financa, IT dhe prodhimi. Sofia, Specialiste e Kontrollit të Cilësisë, shpjegoi proceset e prodhimit për çajrat, infuzionet dhe kakaon.

Vizita theksoi vlerën e të mësuarit përmes përvojës, duke ndihmuar studentët e kursit Hyrje në Biznes (nga Asistent Pedagogia Mikaela Süslü) të lidhin konceptet e diskutuara në auditor me realitetin praktik. Temat si sipërmarrja, historia e kompanisë, strategjia korporative, menaxhimi i operacioneve dhe cilësisë, menaxhimi i zinxhirit të furnizimit dhe roli i teknologjisë në garantimin e efikasitetit dhe cilësisë u ilustruan drejtpërdrejt gjatë vizitës.

Vizita në sektorin e prodhimit nxori në pah përkushtimin e KRACO-s ndaj ekselencës, me kontrolle cilësie të zbatueshme në çdo fazë – nga lëndët e para deri te produkti final. Ky angazhim për standarde të larta i ka siguruar kompanisë disa çertifikime cilësie, duke e bërë një emër të respektuar në industri.

Dita u përmbyll në një mënyrë të ëmbël, teksa KRACO i dhuroi grupit mostra të produkteve të saj, duke përfshirë çajra, infuzione, kakao dhe kapuçino.

Universiteti Epoka shpreh mirënjohjen e tij ndaj KRACO-s për mikpritjen dhe përkushtimin në mbështetjen e edukimit. Vizita të tilla janë thelbësore për formimin e të diplomuarve të përgatitur për botën dinamike dhe sfiduese të biznesit.